Në 20:45 në “Santiago Bernabeu” do të zbresin 16 Kupa Kampionesh.
Bëhet fjalë për Realin (e ka fituar 9 herë këtë titull) dhe Milani (ka
triumfuar në shtatë finale).
Një përballje me të
kaluarën për Ricardo Kaka, i cili do të sfidojë ish-shokët e tij të
skuadrës së Milanit. Ylli brazilian do të synojë të marrë fitoren në
këtë takim, ndaj kuqezinjve që ende kanë vështirësi për të gjetur
vetveten. Një tjetër fakt interesant i mbrëmjes së sotme do të jetë
edhe 90-minutëshi që do të zhvillohet në Francë midis Bordeaux-së dhe
Bayern-it.
Të dyja klubet kanë nga katër pikë dhe luajnë sot për kreun e grupit A.
Këto
të dy ekipe janë dy skuadrat që kanë fituar më shumë këtë garë. “Los
Blancos” janë në kërkim të trofeut të dhjetë kontinental, ndërsa ekipi
i Milanit kërkon të fitojë të tetin.
Në këtë sfidë ekipi
spanjoll i Realit shkon me moral të lartë, për arsye se në dy takimet e
para ka marrë 6 pikë, pasi ka mundur ekipin e Marseille-s dhe atë të
Cyrihut.
Ndërsa ekipi i Milanit ndodhet në vendin e tretë në
kuotën e tri pikëve, pasi mundën në takimin e parë Marseille-n,
kuqezinjtë u mundën nga Cyrihu në shtëpi. Pak orë përpara takimit, si
një profesionist i vërtetë, Kaka ka bërë me dije se nuk do t’ia dijë
për kundërshtarët që do të ketë përballë ditën e sotme në “Bernabeu”.
Milani
e ka rritur duke i dhënë imazhin dhe klasin e një prej lojtarëve më
fenomenalë në planet, por braziliani tashmë e ka hedhur pas supeve të
shkuarën, duke menduar vetëm për Real Madridin, ku u transferua këtë
verë.
Kaka mendon se do të ishte më mirë që Reali ta
eliminonte Milanin që në fazën e grupeve, për të shmangur ndonjë
përplasje tjetër të pakëndshme në finale. “Do të jetë shumë e
rëndësishme për ne që ta mbyllim këtë fazë në krye të grupit dhe të
eliminojmë Milanin, që në momente të rëndësishme arrin të ringrihet.
Nëse shënoj, nuk do të gëzoj, por jam gati të gjuaj penallti, duke parë se Cristiano Ronaldo mungon”, - u shpreh dje fantazisti